اللہ تعالیٰ کا قول اے نبی جب تم اپنی بیویوں کو طلاق دینا چاہو تو اس وقت دو کہ اس کی عدت کا وقت شروع ہو اور عدت کو شمار کرو، احصینا کے معنی ہیں ہم نے یاد کیا اور شمار کیا اور سنت کے مطابق طلاق یہ ہے کہ ایسے طہر میں اس کو طلاق دے کہ جس میں صحبت نہ کی ہو اور دو گواہ مقرر کرے

ترجمہ:

ہم سے اسماعیل بن عبداللہ اویسی نے بیان کیا، کہا کہ مجھ سے امام مالک نے بیان کیا، ان سے نافع نے اور ان سے عبداللہ بن عمر ؓ نے کہ  انہوں نے اپنی بیوی  (آمنہ بنت غفار)  کو رسول اللہ  ﷺ  کے زمانہ میں  (حالت حیض میں)  طلاق دے دی۔ عمر بن خطاب ؓ نے نبی کریم  ﷺ  سے اس کے متعلق پوچھا: تو آپ  ﷺ  نے فرمایا کہ عبداللہ بن عمر ؓ سے کہو کہ اپنی بیوی سے رجوع کرلیں اور پھر اپنے نکاح میں باقی رکھیں۔ جب ماہواری  (حیض)  بند ہوجائے، پھر ماہواری آئے اور پھر بند ہو، تب اگر چاہیں تو اپنی بیوی کو اپنی نکاح میں باقی رکھیں اور اگر چاہیں تو طلاق دے دیں  (لیکن طلاق اس طہر میں)  ان کے ساتھ ہمبستری سے پہلے ہونا چاہیے۔ یہی  (طہر کی)  وہ مدت ہے جس میں اللہ تعالیٰ نے عورتوں کو طلاق دینے کا حکم دیا ہے۔

صحیح بُخاری

حدیث نمبر: ٥٢٥١ حدیث صحیحہ